ممكن يجيلك فى يوم فكره منحرفه او شبه منحرفه وسعات مستطيله او مدوره او حتي مربعه .. هايرد علياعنتر ويقولى وده يطلع ايه ؟ اقول يعني مثلا عمرك مافى مره وانت قاعد كده فكرت تدايق حد؟ او حتي ترخم على حد قالى لا بس فى مره من المرات حبيت ادخل ماتش مصر مع الجزاير ودي كانت اكبر فكره شبه منحرفه بكل المقاييس فكرت اعملها ؟ ...........
قولتله ليه يا عنتر انت كنت بتشجع مين لاسمح الله ؟
بصلي بصه ال يعني مش عاجبه السؤال وقالى مش هارد ... المهم قولتله ليه يا عنتر بس ده انت حبيبي من زمان قالى وانتى شكلك بدأتي تخرفي زي الساعه الواقفه ازاى يعني هاحضر ماتش المنتخب المصري مع الجزائري ومش هاشجع مصر !!!
قولتله معلش برضه الوضع ميسلمش .. مانت ممكن تكون روحت تشجع المنتخب التانى تحت تهديد السلاح ! او هددوك انهم هايخلوك تخلع ساعتك ماهو حصل مع ناس تانيه ..
قالى لاااااااااااااا مش انا اللى يحصل معايا كده قولتله امال مين اللى هايحصل معاه كده قالى شوفي انتى بقى
قولتله طيب يا عنتر سيبك من الموضوع ده وقولى تفتكر مين السبب فى كل ده اديلك اختيارات ؟ قالى اه اديني .. قولتله تفتكر ان السبب
1- ده جمهور ومشجعيين من النوع المجرم اصلا ؟
2- دول فى حد ليه مصلحه من اللى بيحصل ده ؟يعني هم عبد المأمور؟
3- ولا انت متفق بقى يا عنتر من ورايا مع دوله تالته ليها مصلحه ؟؟
بصلى عنتر وقالى ؟ تفتكري انا هاشترك مع الدوله التالته دي لييه طيب هي عايزه تعمل استمثارات جوه البلد وعشان السبب ده حاولت تعمل فتنه ويحصل زي مانتي شايفه بالاستعانه بشويه مجرميين اهم برضه يظبطوا الموضوع واهو بالمره مصر تسحب اوراقها من هناك وتدخل الدوله التالته دي ؟ !!! قولتله الكلام ده خطير يا عنتر حاسب على نفسك .. قاللى صدقيني انا فاهم خليكي انتى بس فى الكليه بتاعتك وسيبك من الكلام بتاع الناس الكبيره ده ..
قولتله بس انا شايفه يا عنتر حاجه اكبر من كده ؟ قالى طيب ماتقومي تعملي بقى كوبايتين شاي ومتنسيش انا بشرب ست سبع معالق سكر
وياريت بقى لو معاكي شويه كحك بقى من بتاع العيد ولا انتى ناويه تأجليه لبعد العيد زي نااس ! قولتله أنا لااالا يا عنتر من عنيا الاتنين
ده انت تأمر بس يا عنتورتي ..
( وادي الشاي عملناه والكحك كمان اهو يا سيدي )
قالى ايوه كده اسمع بمزاج .. قولى بقى كنتي عايزه تقولى ايه
قولتله يا عنتر انا حاسه باللى انت قولته ومقتنعه بيه شويه بس مش عايزه اقولك يا أخي انا مش مرتاحه برضه حاسه ان الموضوع كبير
عنتر قالى طيب وانتى شايفه ان (المأمور ) ده كان ميين قولتله معرفش يا عنتر بس انا من رأيي نروح بقى نقول لأمهم فرنسا ونشوف يعني ماحنا لازم ناخد برأي (ولي الاأمر ) قالى ياااه لسه هانروح فرنسا !!! هو انا فيا صحه
قولتله اه يا عنتر فيك . . وهانروح نشوف حتي الجزائريين هناك بقى واهو بالمره نسأل حد فرنساوي كده من اللى بيتكلم فرنساوي يعني
وناخد رأيه فى اللى حصل
قالى طيب قومي بقى حضري الغدا عشان انا جعت تانى قولتله يادي المصيبه انت مبتبطلش أكل ! قالى وانتى يعني اللى بتبطلى تحلمى بحجاات كبيره اوى وعايزه تاخدي حق المصريين .. روحي بس روحي هاتى اى حاجه تصبيره من المطبخ على مالغدا يجهز !